你伯爷出黎行，半路就去咗卖咸鸭蛋，睇个势，依家个地盘分成三嚿，益州睇黎都系保唔住嘅嘞，以后个世道睇黎都几难崖。但系你伯爷留低班细慨都好忠心，班懵柄出去劈友连命都唔要，呢D都系睇在你老豆以前俾钱又俾女的份上，现家想报答返你啫。
嗱，阿叔我现家就只系想你醒醒定定，搞掂你老豆嘅遗愿，等D兄弟都有得威;千祈唔好将自己当成一嚿叉烧，辜负左班手足。
家吓班兄弟都系自己友嚟，想闹边个掴边个，都要公平;唔俾心机做野嘅，成日系度搞三搞四嘅，同埋份人忠忠直直嘅，就交俾保卫科，应该斩手既斩手，应该升职嘅就升职，甘样就表现到你对大家都系公平嘅，你千其唔好帮埋一边，对大家大细超。
郭仔、费仔、董仔，份人都好老实，做野好周到，你爷伯在世个时就特别睇得起佢地，临死前叫佢地好好帮扶你，阿叔我话斋，会里面大大细细嘅 事情都可以交俾佢地;你个个懵柄向叔，人好好，亦都好生猛，劈得玩得，你伯爷都话佢“掂”，你得就提拔一下，我觉得收陀地劈友嘅事就交俾佢，一定可以搞大 我地个地盘，以后就冇人敢惹我地架嘞。
我地旧阵时个会点解开始甘劲呢，就系因为一直收埋D老实人，赶走D呃饮呃食既，后黎点解会搞到甘衰，就系因为身边剩番班口噏噏当秘笈 嘅废人，你伯爷以前次次同我倾计，讲起呢单野都赤赤痛。侍中、尚书、长史、参军，呢几条友都系阿叔我斩过鸡头嘅好兄弟，你一定要信佢地，我地会重振雄风之日就指意晒你嘞!
阿叔本来就系个耕田佬，系南阳都有番几嚿田，在呢个人队人既时代，我不想队人，只系想唔俾人队。
你伯爷唔嫌弃我，三日唔埋两日就走去我屋企，问我点搞好个会，阿叔我就感激到标晒马尿，甘就跟左你老豆啦。 后黎我地会同操爷个会开片，衰左，阿叔我撑住成个会，到现家都廿几年罗。
你伯爷知道阿叔我醒目，所以卖咸鸭蛋之前就将大事都交托晒俾我，自从换左你做阿头之后，我就日日失眠，担心辜负左大佬嘅心意，所以五月个 时就带住班手兄开船过河，去个个山K啦嘅地方，搞掂晒所有应该搞定嘅野。依家南边无人再敢搞三搞四，我地班靓又人强马壮，应该好好地俾班手足疏弗下。然后 再将中原打番番黎，将个D冇本心嘅二五仔通通做低晒，将我地个D忠字头嘅都扶番起身。咁样我就算对得你伯爷住啦。至于要点搞，冧桥呢D甘嘅野就要靠攸之、 祎仔、允仔佢地嘞。
呢一次阿叔我就系去劈班契弟，劈唔成嘅话你话点就点。如果搞唔掂个会，你就去搵攸之、祎仔、允仔，我就唔信个班野敢吃碗面反碗底。阿仔 你都应该揾个时间好好地甘谂下你伯爷既话。甘你阿叔我就好欣慰啦。得啦得啦，时间到，去劈友啦，男人老狗，标晒马尿甘，都唔知讲左D乜野。
